ધરતી પરનું સ્વર્ગ ગણાતું જમ્મુ-કાશ્મીર હાલમાં કુદરતી આફતનો સામનો કરી રહ્યું છે. કાશ્મીરના સુંદર પહાડો પર મેઘતાંડવનો કહેર વર્તાયો છે, જેના કારણે સ્થાનિક લોકો મુશ્કેલીમાં મુકાયા છે. જમ્મુ-કાશ્મીરના રિયાસી જિલ્લાના બટોહી વિસ્તારમાં અચાનક વાદળ ફાટવાની (Cloudburst) ઘટના સામે આવી છે. આ દુર્ઘટનાને પગલે સમગ્ર વિસ્તારમાં જોતજોતામાં પૂર જેવી ભયાનક સ્થિતિ સર્જાઈ ગઈ છે.
ધસમસતા પ્રવાહ સાથે ઘરોમાં ઘૂસ્યો કાટમાળ, ભારે નુકસાન
વાદળ ફાટવાને કારણે પહાડો પરથી પાણીનો પ્રવાહ એટલો ઝડપી હતો કે તે પોતાની સાથે કાદવ અને કાટમાળ પણ ઘસડી લાવ્યો હતો. આ ધસમસતો પ્રવાહ સીધો નીચે આવેલા રહેણાંક વિસ્તારોમાં ઘૂસી ગયો હતો. જેના કારણે અનેક સ્થાનિક લોકોના મકાનોને મોટું નુકસાન પહોંચ્યું છે. અચાનક આવેલા આ પૂર અને કાટમાળના કારણે સ્થાનિક રહીશો લાચાર બની ગયા છે અને તેમને ભારે હાલાકી વેઠવી પડી રહી છે.
વહીવટી તંત્ર એક્શનમાં: બચાવ કામગીરી શરૂ, કોઈ જાનહાનિ નહીં
ઘટનાની જાણ થતાં જ સ્થાનિક પ્રશાસન અને રેસ્ક્યૂ ટીમ તાત્કાલિક ઘટનાસ્થળે દોડી ગઈ છે. રાહત અને બચાવ કામગીરી યુદ્ધના ધોરણે શરૂ કરી દેવામાં આવી છે. પહાડી ઢોળાવ અને નદી કિનારાની નજીક રહેતા લોકોને સાવચેત રહેવાની અને સુરક્ષિત સ્થળે ખસી જવાની કડક સલાહ આપવામાં આવી છે. રાહતની વાત એ છે કે આટલી મોટી હોનારત છતાં હજુ સુધી કોઈ જાનહાનિના સમાચાર સામે આવ્યા નથી, જે એક મોટો આશકારો છે.
હવામાન વિભાગની ચેતવણી: હજુ પણ ભારે વરસાદ અને કરા પડવાની આગાહી
જમ્મુ-કાશ્મીરમાં હજુ પણ સંકટ ટળ્યું નથી. હવામાન વિભાગ દ્વારા આજે પણ રાજ્યના વિવિધ વિસ્તારોમાં ભારે વરસાદની આશંકા વ્યક્ત કરવામાં આવી છે. એટલું જ નહીં, કેટલાક વિસ્તારોમાં ભારે પવન ફૂંકાવાની સાથે કરા પડવાની (Hailstorm) પણ ચેતવણી આપવામાં આવી છે. પહાડી વિસ્તારોમાં મુસાફરી કરનારા અને સ્થાનિક લોકોને આગામી થોડા કલાકો સુધી ખાસ સતર્ક રહેવા માટે અપીલ કરવામાં આવી છે.
