IMD Rain Alert : ભારતીય હવામાન વિભાગે 22 જુલાઈએ દેશના અનેક ભાગોમાં ભારેથી અતિ ભારે વરસાદની આગાહી કરી છે. ખાસ કરીને પહાડી રાજ્યોમાં ભૂસ્ખલન, અચાનક પૂર અને રસ્તાઓ બંધ થવાનું જોખમ વધી ગયું છે. મેદાની વિસ્તારોમાં પણ ગાજવીજ, વીજળીના કડાકા અને મુશળધાર વરસાદની સંભાવના વ્યક્ત કરવામાં આવી છે.

હવામાન વિભાગની આગાહી બાદ વિવિધ રાજ્યોના વહીવટી તંત્રને એલર્ટ રહેવા સૂચના આપવામાં આવી છે. સંભવિત આપત્તિને ધ્યાનમાં રાખીને NDRF અને SDRF સહિતની બચાવ ટીમોને પણ સ્ટેન્ડબાય રાખવામાં આવી છે.

હિમાચલ પ્રદેશમાં IMDનું રેડ એલર્ટ

હિમાચલ પ્રદેશમાં સતત વરસી રહેલા મુશળધાર વરસાદને કારણે અનેક વિસ્તારોમાં સ્થિતિ ગંભીર બની છે. હવામાન વિભાગે રાજ્ય માટે રેડ એલર્ટ જાહેર કર્યું છે. ભારે વરસાદના કારણે ભૂસ્ખલન, રસ્તાઓ પર કાટમાળ ધસી પડવા અને નદી-નાળામાં અચાનક પાણી વધવાનું જોખમ છે.

કિન્નોર જિલ્લામાં ભૂસ્ખલનને કારણે જૂનો હિન્દુસ્તાન-તિબ્બત માર્ગ બંધ થઈ ગયો છે. શલખર અને સામદો નજીક રસ્તા પર કાટમાળ ધસી પડતાં વાહનવ્યવહાર ખોરવાયો છે. રાજ્યમાં કુલ 36 જેટલા રસ્તાઓ બંધ થયા હોવાનું સામે આવ્યું છે.

વરસાદને કારણે 43 પીવાના પાણીની યોજનાઓ અને પાંચ વીજ ટ્રાન્સફોર્મરને પણ અસર પહોંચી છે. રસ્તાઓ બંધ થતાં સ્થાનિક લોકોની સાથે પ્રવાસીઓને પણ મુશ્કેલીનો સામનો કરવો પડી રહ્યો છે.

લદ્દાખ-કારગિલમાં આભ ફાટ્યું

લદ્દાખના કારગિલ વિસ્તારમાં વાદળ ફાટવાની ઘટનાને કારણે ભારે નુકસાન થયું છે. પૂરના ધસમસતા પ્રવાહમાં ખેતીલાયક જમીન ધોવાઈ ગઈ છે, જ્યારે અનેક વૃક્ષો અને મિલકતોને નુકસાન પહોંચ્યું છે.

કેટલાક વાહનો પણ પૂરના પ્રવાહમાં તણાયા હોવાની માહિતી સામે આવી છે. સ્થિતિની ગંભીરતાને ધ્યાનમાં રાખીને અનેક વિસ્તારોની શૈક્ષણિક સંસ્થાઓમાં રજા જાહેર કરવામાં આવી છે. સ્થાનિક તંત્ર દ્વારા લોકોને નદી-નાળા અને જોખમી વિસ્તારોની નજીક ન જવા અપીલ કરવામાં આવી છે.

ઉત્તરાખંડમાં ભૂસ્ખલન અને પૂરનો ખતરો

ઉત્તરાખંડ જેવા પહાડી રાજ્યમાં ભારે વરસાદને કારણે ભૂસ્ખલન અને અચાનક પૂરનું સંકટ તોળાઈ રહ્યું છે. ખાસ કરીને નીચાણવાળા વિસ્તારોમાં પાણી ભરાવાની પ્રબળ શક્યતા છે.

પહાડી રસ્તાઓ પર મુસાફરી કરતા લોકોને સાવચેત રહેવા અને હવામાન તથા ટ્રાફિક સંબંધિત સૂચનાઓ જાણ્યા બાદ જ મુસાફરી કરવા જણાવાયું છે. જમ્મુ-કાશ્મીરના કેટલાક વિસ્તારોમાં પણ વરસાદી માહોલ યથાવત રહેવાની શક્યતા છે. પહાડી વિસ્તારોમાં રહેતા લોકોને સતર્ક રહેવા વિનંતી કરવામાં આવી છે.

દિલ્હી-NCRમાં ગાજવીજ સાથે ભારે વરસાદ

દિલ્હી અને તેની આસપાસના વિસ્તારોમાં ગાજવીજ અને વીજળીના કડાકા-ભડાકા સાથે ભારે વરસાદની આગાહી કરવામાં આવી છે. વરસાદને કારણે નીચાણવાળા વિસ્તારોમાં પાણી ભરાવા અને ટ્રાફિક વ્યવસ્થા ખોરવાવાની શક્યતા છે. વાહનચાલકોને વરસાદ દરમિયાન ધીમી ગતિએ વાહન ચલાવવા અને પાણી ભરાયેલા માર્ગોથી દૂર રહેવાની સલાહ આપવામાં આવી છે.

હરિયાણા માટે આગામી 72 કલાક ભારે

અરબી સમુદ્ર અને બંગાળની ખાડીમાંથી સતત ભેજ મળી રહ્યો છે. તેની સાથે ટ્રફ અને ચક્રવાતી સિસ્ટમ સક્રિય બનતાં હરિયાણામાં આગામી 48થી 72 કલાક દરમિયાન ભારે વરસાદ પડી શકે છે.

કેટલાક વિસ્તારોમાં મુશળધાર વરસાદ સાથે વીજળી પડવાની પણ શક્યતા વ્યક્ત કરવામાં આવી છે. ખેડૂતો અને ખુલ્લા વિસ્તારમાં કામ કરતા લોકોને ખરાબ હવામાન દરમિયાન સુરક્ષિત સ્થળે રહેવાની સલાહ અપાઈ છે.

ઉત્તર પ્રદેશ અને બિહારમાં અતિ ભારે વરસાદની શક્યતા

ઉત્તર પ્રદેશ અને બિહારના અનેક વિસ્તારોમાં અતિ ભારે વરસાદની આગાહી કરવામાં આવી છે. સતત વરસાદને કારણે નદીના જળસ્તરમાં વધારો, શહેરી વિસ્તારોમાં પાણી ભરાવા અને ગ્રામ્ય વિસ્તારોમાં પૂર જેવી સ્થિતિ સર્જાઈ શકે છે.

કેરળ અને કર્ણાટકમાં પણ ભારે વરસાદની શક્યતા છે. પૂર્વોત્તર ભારત અને સિક્કિમમાં વરસાદને કારણે ભૂસ્ખલન અને માર્ગ વ્યવહારને અસર પહોંચી શકે છે.

ગુજરાત અને મહારાષ્ટ્રના દરિયાકાંઠે એલર્ટ

ગુજરાત અને મહારાષ્ટ્રના અનેક વિસ્તારોમાં પણ ભારે વરસાદની આગાહી કરવામાં આવી છે. ખાસ કરીને દરિયાકાંઠાના વિસ્તારોમાં તંત્રને એલર્ટ રહેવા જણાવાયું છે.

દરિયામાં પવનની ગતિ વધવાની અને ઊંચા મોજાં ઉછળવાની શક્યતાને ધ્યાનમાં રાખીને માછીમારોને સાવચેત રહેવા તથા તંત્રની સૂચનાઓનું પાલન કરવા અપીલ કરવામાં આવી છે.

NDRF અને SDRFની ટીમો સ્ટેન્ડબાય

હવામાન વિભાગની આગાહી બાદ કેન્દ્ર અને રાજ્ય સરકારો દ્વારા સંબંધિત વિભાગોને તૈયાર રહેવા સૂચના આપવામાં આવી છે. NDRF, SDRF, ફાયર બ્રિગેડ અને સ્થાનિક બચાવ ટીમોને સ્ટેન્ડબાય રાખવામાં આવી છે.

લોકોને નદી, નાળા, દરિયાકિનારા, ભૂસ્ખલનની શક્યતા ધરાવતા પહાડી રસ્તા અને પાણી ભરાયેલા વિસ્તારોમાં ન જવાની અપીલ કરવામાં આવી છે. કોઈપણ અફવા પર વિશ્વાસ કરવાને બદલે હવામાન વિભાગ અને સ્થાનિક તંત્ર દ્વારા જાહેર કરવામાં આવતી સત્તાવાર સૂચનાઓનું પાલન કરવું જરૂરી છે.

આ પણ વાંચો : દક્ષિણ ગુજરાતમાં રેડ એલર્ટ, વલસાડ-નવસારીમાં મેઘતાંડવની આગાહી