Imran Khan Health Update : પાકિસ્તાનના પૂર્વ વડાપ્રધાન અને PTIના પ્રમુખ ઈમરાન ખાનને અડધી રાતે ભારે સુરક્ષા વચ્ચે અદિયાલા જેલમાંથી ઈસ્લામાબાદની શિફા ઈન્ટરનેશનલ હોસ્પિટલ લઈ જવામાં આવ્યા હતા. હોસ્પિટલમાં 6 નિષ્ણાત ડૉક્ટરોની ટીમે તેમની વિગતવાર તબીબી તપાસ કરી હતી.
મેડિકલ તપાસ પૂર્ણ થયા બાદ ડૉક્ટરોએ ઈમરાન ખાનને હોસ્પિટલમાં દાખલ કરવાની જરૂર નથી તેમ જણાવી તેમને ફરી અદિયાલા જેલમાં મોકલી દીધા હતા. તબીબી ટીમના જણાવ્યા મુજબ, હાલની સ્થિતિમાં તેમને જેલમાં રાખવું વધુ સુરક્ષિત માનવામાં આવ્યું હતું.
સુપ્રીમ કોર્ટના આદેશ બાદ હોસ્પિટલ ખસેડાયા
ઈમરાન ખાનને હોસ્પિટલ લઈ જવાનો નિર્ણય પાકિસ્તાનની સુપ્રીમ કોર્ટના આદેશ બાદ લેવામાં આવ્યો હતો. કોર્ટે તેમની તબિયતને ધ્યાનમાં રાખીને બે દિવસની અંદર મેડિકલ તપાસ અને જરૂરી સારવાર માટે શિફા હોસ્પિટલ ખસેડવાનો નિર્દેશ આપ્યો હતો.
કોર્ટે ખાસ મેડિકલ બોર્ડ દ્વારા તપાસ કરાવવા તેમજ તપાસ દરમિયાન ઈમરાન ખાનના અંગત ડૉક્ટર અને તેમની પત્ની ડૉ. ઉઝમાને હાજર રહેવાની મંજૂરી આપી હતી. સારવાર પાછળ થનારો ખર્ચ તેમના પરિવાર દ્વારા ઉઠાવવાનો રહેશે.
હોસ્પિટલની બહાર ચુસ્ત સુરક્ષા
ઈમરાન ખાનને હોસ્પિટલ લાવવામાં આવે તે પહેલાં જ શિફા ઈન્ટરનેશનલ હોસ્પિટલ અને આસપાસના વિસ્તારમાં કડક સુરક્ષા વ્યવસ્થા ગોઠવી દેવામાં આવી હતી. સાથે મોટી સંખ્યામાં પોલીસકર્મીઓ તહેનાત કરવામાં આવ્યા હતા.
આ અગાઉ ઈસ્લામાબાદના ઇન્સ્પેક્ટર જનરલ ઓફ પોલીસ (IGP) સૈયદ અલી નાસિર રિઝવીએ ઉચ્ચ પોલીસ અધિકારીઓ સાથે હોસ્પિટલની મુલાકાત લઈને સુરક્ષા વ્યવસ્થાની સમીક્ષા પણ કરી હતી.
સરકારની રિવ્યૂ પિટિશનનો મામલો
ઈમરાન ખાનને ખાનગી હોસ્પિટલમાં સારવાર માટે ખસેડવાના સુપ્રીમ કોર્ટના આદેશ સામે કેન્દ્ર સરકારે રિવ્યૂ પિટિશન દાખલ કરી હતી. સરકારનો દાવો હતો કે જેલમાંથી હોસ્પિટલ ખસેડવાનો નિર્ણય મેડિકલ નિષ્ણાતોની સલાહના આધારે લેવો જોઈએ.
જોકે, સુપ્રીમ કોર્ટના રજિસ્ટ્રાર કાર્યાલયે અરજીમાં ટેકનિકલ ખામીઓ દર્શાવી હતી. ત્યારબાદ ઈસ્લામાબાદના ચીફ કમિશનરે આ રિવ્યૂ પિટિશન પાછી ખેંચી લીધી હતી.
2023થી જેલમાં છે ઈમરાન ખાન
73 વર્ષીય ઈમરાન ખાન ઓગસ્ટ 2023થી જેલમાં બંધ છે. તેમની સામે અનેક કેસોમાં સજા થઈ ચૂકી છે. એપ્રિલ 2022માં અવિશ્વાસ પ્રસ્તાવ બાદ તેમને પાકિસ્તાનના વડાપ્રધાન પદેથી હટાવવામાં આવ્યા હતા.
ત્યારબાદ તેમની સામે અનેક કાનૂની કેસ થયા છે. ઈમરાન ખાન અને તેમની પાર્ટી PTI આ કાર્યવાહી પાછળ રાજકીય બદલો હોવાનો આરોપ લગાવે છે.
