બોમ્બે હાઈકોર્ટે રણબીર કપૂર સ્ટારર ફિલ્મ ‘રામાયણ: પાર્ટ 1’ને વચગાળાની કૉપિરાઇટ સુરક્ષા આપી છે. કોર્ટે અજાણ્યા લોકો, સંસ્થાઓ અને ડિજિટલ પ્લેટફોર્મ્સને ફિલ્મનું પરવાનગી વિના રેકોર્ડિંગ, હોસ્ટિંગ અને સ્ટ્રીમિંગ કરવાથી રોક્યા છે. ફિલ્મ આવતીકાલે સિનેમાઘરોમાં રીલિઝ થવા જઈ રહી છે. રીલિઝ પહેલા જ એડવાન્સ બુકિંગથી 73 કરોડની કમાણી કરી લીધી છે.
આ આદેશ ગૉડપાવર મીડિયા પ્રાઇવેટ લિમિટેડની અરજી પર આપવામાં આવ્યો છે. કંપનીએ ફિલ્મની સ્ક્રિપ્ટ, પાત્રો, ફૂટેજ, ગીતો અને રેકોર્ડિંગને કૉપિરાઇટના ઉલ્લંઘનથી બચાવવાની માંગ કરી હતી. કોર્ટના આદેશથી ફિલ્મની પાઇરેટેડ લિંક્સ અને મિરર સાઇટ્સને દૂર કરવાનો માર્ગ મોકળો થયો છે. ઇન્ટરનેટ સર્વિસ પ્રોવાઇડર્સ અને સોશિયલ મીડિયા પ્લેટફોર્મ્સને લેખિત સૂચના મળ્યા બાદ કાર્યવાહી કરવી પડશે.
ગૉડપાવર મીડિયાએ આનંદ એન્ડ નાઈક કાનૂની ફર્મ મારફતે કોર્ટનો સંપર્ક કર્યો હતો. કંપનીને ફિલ્મના કૉપિરાઇટના ઉલ્લંઘનની આશંકા હતી. કંપનીએ જણાવ્યું કે, માત્ર આમંત્રિત લોકો માટે પ્રીવ્યૂ સ્ક્રીનિંગ રાખવામાં આવ્યું હતું. આ દરમિયાન કડક ગોપનીયતા શરતો લાગુ હતી. તેમ છતાં ફિલ્મના બે ટ્રેલર ચોરીછૂપીથી રેકોર્ડ કરીને ડિજિટલ પ્લેટફોર્મ્સ પર પ્રસારિત કરવામાં આવ્યા.
આ મામલામાં જૉન ડો ઉપરાંત આશરે 34 કંપનીઓ પણ જવાબદાર પક્ષકારો છે. કોર્ટને જણાવવામાં આવ્યું કે, ફિલ્મના પ્રથમ ભાગના નિર્માણમાં આશરે 2,000 કરોડ રૂપિયાનો ખર્ચ થયો છે. બંને ભાગોનું કુલ બજેટ 4,000 કરોડ રૂપિયા છે. ગૂગલ એલએલસી અને વિશ્વભરના સોશિયલ મીડિયા પ્લેટફોર્મ્સ વતી હાજર થયેલા વકીલે કહ્યું કે, તેમને વચગાળાની રાહત આપવાના આદેશ સામે કોઈ વાંધો નથી. તેમણે ખાતરી આપી કે વાંધાજનક લિંકની માહિતી મળતાં જ તેઓ તાત્કાલિક કાર્યવાહી કરશે.
કોર્ટે ફિલ્મને પરવાનગી વિના ફેલાવનારાઓ સામે રોક લગાવવાનો નિર્દેશ આપ્યો છે. તેમાં ‘જૉન ડો’ એટલે કે એવા અજાણ્યા લોકો અને સંસ્થાઓ પર પણ રોકનો સમાવેશ થાય છે, જેમની ઓળખ હજુ સામે આવી નથી. કોર્ટે ઇન્ટરનેટ સર્વિસ પ્રોવાઇડર્સ (ISP) અને સોશિયલ મીડિયા પ્લેટફોર્મ્સને નિર્દેશ આપ્યો છે કે, ફિલ્મ સાથે જોડાયેલી વાંધાજનક લિંક્સ અને તેની નકલો ધરાવતી અન્ય વેબસાઇટ્સની માહિતી મળતાં જ તેમને બ્લૉક કરીને દૂર કરે.
