Typhoon Noul in China : ચીનના દક્ષિણ પ્રાંત ગુઆન્ગડોન્ગમાં શક્તિશાળી ચક્રવાત નોઉલ ત્રાટકતાં અનેક વિસ્તારોમાં ભારે વરસાદ, તોફાની પવન અને પૂર જેવી સ્થિતિ સર્જાઈ છે. હુઈઝોઉના હુઈડોંગ કાઉન્ટીના દરિયાકાંઠે આ ચક્રવાતે લેન્ડફોલ કર્યું હતું. નોઉલ આ વર્ષે ચીનમાં ત્રાટકનાર 12મું અને અત્યાર સુધીનું સૌથી શક્તિશાળી ચક્રવાત હોવાનું જણાવાયું છે.

ગુઆન્ગડોન્ગમાં ભારે વરસાદથી જનજીવન અસ્તવ્યસ્ત

ગુઆન્ગડોન્ગના વિવિધ વિસ્તારોમાં આ ચક્રવાતના કારણે મુશળધાર વરસાદ પડ્યો હતો. જેના કારણે નીચાણવાળા વિસ્તારોમાં પાણી ભરાયા અને પહાડી વિસ્તારોમાં ભૂસ્ખલનનું જોખમ વધ્યું છે. સ્થાનિક અહેવાલોમાં પાણીમાં ફસાયેલા તથા ડૂબેલા વાહનોનાં દૃશ્યો પણ સામે આવ્યા છે.

7 લાખથી વધુ લોકોનું સ્થળાંતર

અગમચેતીના ભાગરૂપે ગુઆન્ગડોન્ગમાં લોકોને સુરક્ષિત સ્થળે ખસેડવામાં આવ્યા હતા. ચક્રવાતને કારણે ટ્રેન સેવાઓ અને ફ્લાઇટ્સ પણ મોટા પ્રમાણમાં પ્રભાવિત થઈ હતી. પાડોશી હોંગકોંગમાં પણ અનેક ફ્લાઇટ રદ કરવામાં આવી અને લોકો ઈજાગ્રસ્ત થયા હતા.

ગાન્સુમાં અચાનક પૂરથી 10 લોકોનાં મોત

પ્રાંતના મોટા ભાગના વિસ્તારોમાં જોરદાર પવનનો મારો ફૂંકાયો, જેના કારણે રસ્તા પર ચાલતો રાહદારી પણ ફંટાયો અને નીચે પડી ગયો. ભારે વરસાદના કારણે ચીનના ગાન્સુમાં આવેલા પૂરમાં 10ના મોત થયા. અહીંના લોકો ભારે હાલાકીનો સામનો કરી રહ્યા છે.

લેવલ-4 ડિઝાસ્ટર રિસ્પોન્સ સક્રિય

સ્થિતિની ગંભીરતાને જોતા ચીનના નેશનલ કમિશન ફોર ડિઝાસ્ટર પ્રીવેન્શન, રિડકશન અને રીલિફે ગુઆન્ગ-ડોન્ગ માટે ચોથા સ્તરની નેશનલ ડિઝાસ્ટર રીલિફ ઈમરજન્સી રિસ્પોન્સને સક્રિય કરી.

ચક્રવાત બાદ નુકસાન પામેલા રસ્તાઓ, જળસંસાધન માળખાં, શાળાઓ અને હોસ્પિટલોના પુનઃસ્થાપન માટે ચીનની કેન્દ્ર સરકારે સહાયરૂપે કેન્દ્રીય બજેટમાંથી  1.47 કરોડ અમેરિકી ડોલરનું ભંડોળ ફાળવ્યું છે.

પૂર અને ભૂસ્ખલનનું જોખમ હજુ યથાવત

ચક્રવાત જમીન પર આવ્યા બાદ નબળું પડ્યું છે, પરંતુ દક્ષિણ અને દક્ષિણ-પશ્ચિમ ચીનના કેટલાક વિસ્તારોમાં ભારે વરસાદ ચાલુ રહેવાની શક્યતા છે. નદીકાંઠા, પહાડી વિસ્તારો અને નીચાણવાળા સ્થળોએ રહેતા લોકોને સાવચેત રહેવા સૂચના આપવામાં આવી છે.

આ પણ વાંચો : ગાંધીનગરના કુડાસણમાં કપિરાજનો આતંક, 7 દિવસમાં 15થી વધુ લોકો પર હુમલો