તમિલનાડુના ભાજપના પૂર્વ પ્રદેશ અધ્યક્ષ કે. અન્નામલાઈએ ભાજપ સાથેનો પોતાનો છેડો ફાડી નાખ્યો છે. એટલું જ નહીં, પાર્ટીમાંથી રાજીનામું આપતાની સાથે જ તેમણે એક પ્રેસ કોન્ફરન્સ યોજીને પોતાની નવી રાજકીય પાર્ટી ‘અન્નામલાઈ મક્કલ ઈયક્કમ’ (Annamalai Makkal Iyakkam – AMI) બનાવવાની સત્તાવાર જાહેરાત કરી છે.
BJP National President Nitin Nabin has accepted the resignation submitted by the Tamil Nadu Ex-State President K Annamalai from the primary membership of the Party. pic.twitter.com/qaQ9gWPL6g
— ANI (@ANI) June 5, 2026
“હું ભાજપનો વ્યક્તિ છું કે તમિલિયન?” – રાજીનામા પાછળનો મોટો ખુલાસો
ચેન્નાઈમાં અન્નામલાઈએ પત્રકારોને સંબોધતા ભાજપ છોડવાના પોતાના કારણો પર ખુલીને વાત કરી હતી. તેમણે કહ્યું કે ભાજપના નેતાઓ સાથે તેમના વિચારો મેળ ખાતા ન હતા, જેના કારણે તેમણે આ આકરો નિર્ણય લેવો પડ્યો છે. પોતાના મનમાં ચાલી રહેલા સંઘર્ષનો સ્વીકાર કરતા અન્નામલાઈએ જણાવ્યું કે, મારી અંદર એક બહુ મોટો દ્વંદ્વ ચાલી રહ્યો હતો કે, હું ભાજપનો વ્યક્તિ છું કે તમિલિયન. વધુમાં ઉમેરતા તેમણે એ પણ કહ્યું કે, તેમણે ગત વર્ષે જ પાર્ટી છોડવાનું સંપૂર્ણ મન બનાવી લીધું હતું અને આ અંગે હાઈકમાન્ડને વાત પણ કરી દીધી હતી. પરંતુ, તે સમયે ચૂંટણીઓ નજીક હોવાના કારણે પાર્ટીના હિતમાં તેમણે રોકાવું પડ્યું હતું.
ગઠબંધનની જૂની રાજનીતિને ટક્કર: AMI લડશે આગામી વિધાનસભા ચૂંટણી
અન્નામલાઈએ પોતાની ભવિષ્યની રાજકીય બ્લુપ્રિન્ટ વિશે વાત કરતા સ્પષ્ટ કર્યું કે તેઓ તમિલનાડુમાં એક નવું રાજકીય આંદોલન શરૂ કરવા જઈ રહ્યા છે. તેમની નવી બનેલી પાર્ટી ‘AMI’ તમિલનાડુમાં આગામી વિધાનસભા ચૂંટણીમાં તમામ બેઠકો પર પૂરી તાકાત સાથે ચૂંટણી લડશે. તેમના મતે, રાજ્યને હવે એક એવી નવી અને સ્વતંત્ર રાજકીય વિચારધારાની જરૂર છે, જે વર્ષો જૂની પરંપરાગત ગઠબંધન રાજનીતિથી બિલકુલ અલગ અને મુક્ત હોય.
થાલાપતિ વિજય અને ભાજપ સામે અન્નામલાઈનો ત્રિપાંખીયો જંગ
અન્નામલાઈના આ આક્રમક વલણ અને નવી પાર્ટીની જાહેરાત બાદ તમિલનાડુનું રાજકીય મેદાન હવે વધુ રસપ્રદ બની ગયું છે. હવે રાજ્યમાં નવા મુખ્યમંત્રી થાલાપતિ વિજય (Thalapathy Vijay) અને ભાજપની સામે અન્નામલાઈ પોતાની નવી પાર્ટી સાથે સીધો મોરચો માંડશે. એક તરફ ભાજપ પોતાનો ગઢ બચાવવા મથશે, તો બીજી તરફ અન્નામલાઈ ‘તમિલ ગૌરવ’ અને સ્વતંત્ર વિચારધારાના જોરે જનતાના દિલ જીતવાનો પ્રયાસ કરશે. વળાંકોથી ભરેલા તમિલનાડુના રાજકારણમાં આ નવો અધ્યાય કેવો વળાંક લે છે, તેના પર હવે આખા દેશની નજર રહેશે.
