Instagram તેના યુઝર્સ માટે એક મોટું અપડેટ લાવી રહ્યું છે. Instagram એના એલ્ગોરિધમમાં એવો ફેરફાર કરી રહ્યું છે, જેના કારણે યુઝર્સ પોતે નક્કી કરી શકશે કે તેમને ફીડ અને રીલ્સમાં કેવું કન્ટેન્ટ જોવું છે. 

Instagramના હેડ Adam Mosseri એ Your Algorithm નામના નવા ટૂલ વિશે માહિતી આપી છે. યુઝર્સ આ ટૂલની મદદથી Instagramના એલ્ગોરિધમને વધુ સારી રીતે કંટ્રોલ કરી શકશે. એટલે કે, હવે એપ તમને જબરદસ્તી એ જ પ્રકારના વીડિયો અથવા પોસ્ટ બતાવતી રહેશે એવું જરૂરી નહીં રહે..

શું છે ‘Your Algorithm’ ફીચર?

Your Algorithm ફીચર દ્વારા યુઝર્સ જોઈ શકશે કે Instagram તેમના વિશે કયા Topics માં રસ હોવાનું માને છે. ત્યારબાદ યુઝર્સ તે topics બદલી શકશે, દૂર કરી શકશે અથવા પોતાની પસંદગી મુજબ ફીડ અને રીલ્સને વધુ પર્સનલાઇઝ કરી શકશે. સરળ ભાષામાં કહીએ તો, Instagram હવે માત્ર તમારા Clicks અને watch time પરથી જ કન્ટેન્ટ બતાવવાનું નહીં, પણ તમને સીધું પૂછવાનું પણ શરૂ કરશે કે તમને ખરેખર શું જોવું છે.

ફીડમાંથી જ બદલાશે એલ્ગોરિધમ

આ નવા અપડેટથી યુઝર્સને પોતાની પસંદગી બદલવા માટે વારંવાર settingsમાં જવાની જરૂર નહિ પડે. આ અપડેટની મદદથી યુઝર્સ સીધા હોમ ફીડ અથવા રીલ્સ જોતી વખતે જ પોતાના એલ્ગોરિધમમાં ફેરફાર કરી શકે.

અપકમિંગ પ્રિવ્યૂ મુજબ યુઝર્સ જ્યારે હોમ ફીડમાં હશે ત્યારે તેઓ પોતાના algorithm topics જોઈ શકશે અને તેમાં ફેરફાર કરી શકશે. આ ફેરફાર બાદ Instagram તે મુજબ વધુ સંબંધિત કન્ટેન્ટ બતાવવાનો પ્રયાસ કરશે.

રીલ્સ જોતી વખતે મળશે રીયલ-ટાઇમ કંટ્રોલ

Instagram રીલ્સ માટે પણ વધુ સ્માર્ટ કંટ્રોલ પર કામ કરી રહ્યું છે. રીલ જોતી વખતે યુઝર્સ તરત જ નક્કી કરી શકશે કે તેમને આવા પ્રકારના વીડિયો વધુ જોવા છે કે ઓછા.

આ માટે Instagram નવા કંટ્રોલ બટન્સ અને રીયલ-ટાઇમ ટ્યુનિંગ જેવા ફીચર્સ ટેસ્ટ કરી રહ્યું છે. આ ફીચર્સથી યુઝર્સની રીલ્સ ફીડ વધુ ઝડપથી બદલાઈ શકે છે અને બિનજરૂરી કન્ટેન્ટ ઘટી શકે છે.

યુઝર્સ લાંબા સમયથી કરી રહ્યા હતા ફરિયાદ

છેલ્લા ઘણા સમયથી Instagram યુઝર્સની સૌથી મોટી ફરિયાદ એ હતી કે એપ તેમને તેમની પસંદગીના લોકોની પોસ્ટ કરતાં અજાણ્યા creators અને random reels વધુ બતાવે છે. ઘણા યુઝર્સ ઈચ્છતા હતા કે Instagram તેમને એવા લોકોની પોસ્ટ વધારે બતાવે જેમને તેઓ follow કરે છે.

આ જ ફરિયાદને ધ્યાનમાં રાખીને Instagram હવે એલ્ગોરિધમને વધુ પારદર્શક અને યુઝર-ફ્રેન્ડલી બનાવવા તરફ આગળ વધી રહ્યું છે. ‘Your Algorithm’ ફીચર એ જ દિશામાં મોટું પગલું માનવામાં આવી રહ્યું છે.