વલસાડ જિલ્લાના વાપી શહેરમાંથી એક મોટા સાયબર ઠગાઈ રેકેટનો પર્દાફાશ થયો છે. વલસાડ સ્પેશિયલ ઓપરેશન ગ્રુપ (SOG) દ્વારા હરિયા પાર્ક ડુંગર વિસ્તારમાં દરોડા પાડી એક નકલી ઇન્ટરનેશનલ કોલ સેન્ટર ઝડપવામાં આવ્યું છે. આ કાર્યવાહી દરમિયાન મહિલા અને પુરુષ સહિત કુલ 11 આરોપીઓને ઝડપી પાડવામાં આવ્યા છે.

કેનેડિયન અધિકારી બની લોકોને કરતા હતા ફોન

પ્રાથમિક તપાસમાં સામે આવ્યું છે કે આ કોલ સેન્ટર મારફતે આરોપીઓ પોતાને કેનેડિયન સુરક્ષા એજન્સી CSIS (Canadian Security Intelligence Service) અને RCMP (Royal Canadian Mounted Police)ના અધિકારીઓ તરીકે ઓળખાવી કેનેડિયન નાગરિકોને ફોન કરતા હતા.

આરોપીઓ ફોન પર લોકોને ડરાવતા કે તેમના નામે આવેલા પાર્સલમાં ગેરકાયદેસર ડ્રગ્સ, રોકડ રકમ અથવા અન્ય પ્રતિબંધિત વસ્તુઓ મળી આવી છે.

ડરનો માહોલ ઉભો કરી પડાવતા હતા પૈસા

આરોપીઓ કેનેડિયન નાગરિકોને કાયદાકીય કાર્યવાહી અને ધરપકડનો ભય બતાવી તેમની પાસેથી મોટી રકમ વસૂલતા હતા. ઠગાઈની આ સમગ્ર પ્રક્રિયા અત્યંત આયોજનબદ્ધ રીતે ચલાવવામાં આવતી હોવાનું પ્રાથમિક તપાસમાં સામે આવ્યું છે.

લેપટોપ, મોબાઇલ અને ડેટા સહિતનો મુદ્દામાલ જપ્ત

દરોડા દરમિયાન SOGની ટીમે કોલ સેન્ટરમાંથી અનેક લેપટોપ, મોબાઇલ ફોન, ડિજિટલ ડેટા અને અન્ય ઇલેક્ટ્રોનિક સાધનો જપ્ત કર્યા છે. આ તમામ સાધનોની ફોરેન્સિક તપાસ કરીને વધુ વિગતો મેળવવાની કાર્યવાહી હાથ ધરવામાં આવી છે.

આંતરરાષ્ટ્રીય ઠગાઈ નેટવર્કની આશંકા

તપાસ એજન્સીઓને આશંકા છે કે આ સમગ્ર રેકેટનો સંપર્ક આંતરરાષ્ટ્રીય સાયબર ક્રાઇમ નેટવર્ક સાથે હોઈ શકે છે. પોલીસે ઝડપાયેલા આરોપીઓની પૂછપરછ શરૂ કરી છે અને આ કેસમાં વધુ લોકોની સંડોવણી અંગે પણ તપાસ ચાલી રહી છે.

સાયબર ઠગાઈ સામે સાવધાન રહેવાની જરૂર

તાજેતરના સમયમાં વિદેશી અધિકારી, બેંક અધિકારી અથવા સરકારી એજન્સીના નામે લોકોને ડરાવીને પૈસા પડાવવાના બનાવોમાં વધારો જોવા મળી રહ્યો છે. પોલીસ દ્વારા લોકોને અજાણ્યા કોલ અને શંકાસ્પદ માંગણીઓ સામે સાવધાન રહેવાની અપીલ કરવામાં આવી છે.