ગુજરાતમાં આતંકી નેટવર્ક ફેલાવવાના કથિત પ્રયાસનો પર્દાફાશ કરતા ગુજરાત ATSને વધુ એક મોટી સફળતા મળી છે. ATSએ જૈશ-એ-મોહમ્મદ સાથે જોડાયેલા હોવાના આરોપમાં વધુ પાંચ શખ્સોની ધરપકડ કરી છે. આ પાંચેય આરોપીઓ ગુજરાતના અલગ-અલગ વિસ્તારોમાં સક્રિય હોવાનું તપાસ દરમિયાન સામે આવ્યું હોવાનો ATSનો દાવો છે.
ગુજરાત ATSએ આ કેસમાં અગાઉ આઠ આરોપીઓની ધરપકડ કરી હતી. તેમની સઘન પૂછપરછ અને તપાસ દરમિયાન આતંકી મોડ્યુલ સાથે જોડાયેલા અન્ય લોકોના નામ સામે આવ્યા હતા. આ માહિતીના આધારે ATSએ અલગ-અલગ સ્થળોએ તપાસ અને ઓપરેશન હાથ ધર્યું હતું.
સિદ્ધપુર આસપાસના વિસ્તારમાંથી પાંચ આરોપી ઝડપાયા
ATSની કાર્યવાહી દરમિયાન બિલાલ આબિદ શેરા, મોહમ્મદ અય્યુબ કડીવાલા, મોહમ્મદ હસન કરાડિયા, મોહમ્મદ અય્યુબ સુણાસરા અને મોહમ્મદ સફી મુખીની ધરપકડ કરવામાં આવી છે. આ આરોપીઓને સિદ્ધપુર અને તેની આસપાસના વિસ્તારમાંથી ઝડપી લેવામાં આવ્યા હોવાનું જણાવવામાં આવ્યું છે. આ પાંચ ધરપકડ સાથે આ કેસમાં ઝડપાયેલા આરોપીઓની કુલ સંખ્યા 13 થઈ ગઈ છે.
અગાઉ ઝડપાયેલા આરોપીઓની પૂછપરછમાં ખુલાસો
મળતી માહિતી અનુસાર, અગાઉ ધરપકડ કરાયેલા આઠ આરોપીઓની કસ્ટડી દરમિયાન લાંબી પૂછપરછ કરવામાં આવી હતી. પૂછપરછમાં કથિત મોડ્યુલ સાથે જોડાયેલા અન્ય સભ્યો, તેમની પ્રવૃત્તિઓ અને સંપર્કો અંગે વિગતો સામે આવી હતી.
આ માહિતીના આધારે ATSએ ટેકનિકલ પુરાવા, નિવેદનો અને અન્ય કડીઓની તપાસ કરી હતી. તપાસમાં પૂરતી કડીઓ મળ્યા બાદ વધુ પાંચ આરોપીઓ સામે કાર્યવાહી કરવામાં આવી હોવાનું ATS દ્વારા જણાવવામાં આવ્યું છે.
નેટવર્ક વિસ્તરે તે પહેલાં ATSની કાર્યવાહી
તપાસ એજન્સીના જણાવ્યા પ્રમાણે, આરોપીઓનું નેટવર્ક વધુ વિસ્તરે તે પહેલાં જ કાર્યવાહી કરવામાં આવી હતી. ATSએ અગાઉ અનેક શંકાસ્પદ લોકોની અટકાયત કરીને તેમની પૂછપરછ કરી હતી અને નિવેદનો નોંધ્યાં હતાં.
તપાસ દરમિયાન મળેલા પુરાવા અને માહિતીના આધારે આ પાંચ આરોપીઓની ધરપકડ કરવામાં આવી છે. હવે ATS દ્વારા આરોપીઓના સંપર્કો, નાણાકીય વ્યવહારો, ડિજિટલ ઉપકરણો અને અન્ય સંભવિત કડીઓની તપાસ કરવામાં આવી રહી છે.
ATSએ પ્રેસ કોન્ફરન્સમાં આપી માહિતી
ગુજરાત ATSએ સમગ્ર કાર્યવાહી અંગે પ્રેસ કોન્ફરન્સ કરીને માહિતી આપી હતી. અધિકારીઓએ અગાઉ થયેલી ધરપકડ, પૂછપરછ દરમિયાન મળેલી વિગતો અને વધુ પાંચ આરોપીઓ સુધી પહોંચવા માટે હાથ ધરવામાં આવેલા ઓપરેશન અંગે જાણકારી આપી હતી.
હાલ ATS દ્વારા સમગ્ર કેસની વધુ તપાસ ચાલુ છે. આરોપીઓની કથિત ભૂમિકા અને નેટવર્ક સાથે જોડાયેલા અન્ય લોકો અંગે તપાસ પૂર્ણ થયા બાદ વધુ વિગતો સામે આવી શકે છે.
આ પણ વાંચો : સોના-ચાંદીના ભાવમાં ફરી ઘટાડો, જાણો આજના નવા રેટ
