ભારતીય વિમેન્સ ક્રિકેટ ટીમની સ્ટાર ઓપનર સ્મૃતિ મંધાના (Smriti Mandhana) એ ફરી એકવાર સાબિત કરી દીધું છે કે તેને કેમ વિશ્વની સર્વશ્રેષ્ઠ બેટ્સમેનમાંથી એક ગણવામાં આવે છે. સ્મૃતિ મંધાનાએ ટી-20 વર્લ્ડ કપમાં(T20 World Cup) નેધરલેન્ડ સામે રમાયેલી મેચમાં માત્ર ભારતને જીત જ નથી અપાવી, પરંતુ ક્રિકેટ જગતમાં એક એવો ઈતિહાસ રચી દીધો છે જે આજ સુધી કોઈ પુરુષ કે મહિલા ક્રિકેટર નથી કરી શક્યા.
સ્મૃતિ મંધાના (Smriti Mandhana) T20 આંતરરાષ્ટ્રીય મેચોમાં 600 ચોગ્ગા મારનારી વિશ્વની પ્રથમ ક્રિકેટર બની છે. હજુ સુધી કોઈ પુરુષ ક્રિકેટર કે કોઈ મહિલા ક્રિકેટર 500 ચોગ્ગા પણ ફટકારી શક્યું નથી.
નેધરલેન્ડ સામે ભારતની ભવ્ય જીત
બુધવારે લીડ્સના મેદાન પર ભારત અને નેધરલેન્ડ વચ્ચે રમાયેલી રોમાંચક મેચમાં ભારતીય ટીમે શાનદાર પ્રદર્શન કરતા નેધરલેન્ડને 95 રનથી કારમી હાર આપી છે. ભારતે પ્રથમ બેટિંગ કરતા 209 રન બનાવ્યા હતા. T20 વર્લ્ડ કપમાં ભારતે 200 થી વધુ રન બનાવ્યા હોય તેવું આ પ્રથમ વખત હતું.
ભારતે પ્રથમ બેટિંગ કરતા સ્મૃતિ મંધાના અને શેફાલી વર્માએ પ્રથમ વિકેટ માટે 115 રનની ભાગીદારી કરી હતી. લક્ષ્યનો પીછો કરતા નેધરલેન્ડ્સ 114 રનમાં ઓલઆઉટ થઈ ગયું હતું. ભારતે મેચ 95 રનથી જીતી લીધી, જે T20 વર્લ્ડ કપમાં ભારતનો સૌથી મોટો વિજય છે.
600 ચોગ્ગા પૂરા કરનાર વિશ્વની નંબર-1 પ્લેયર
સ્મૃતિ મંધાના મેન્સ અને વિમેન્સ એમ બંને T-20 ઇન્ટરનેશનલ ક્રિકેટમાં 600 ચોગ્ગા (Fours) પૂરા કરનાર વિશ્વની સૌપ્રથમ બેટ્સમેન બની ગઈ છે. T-20 ક્રિકેટના આ સૌથી ટૂંકા ફોર્મેટમાં હજુ સુધી કોઈ પુરુષ ખેલાડી 600 ચોગ્ગાના આ આંકડા સુધી પહોંચી શક્યો નથી.
સ્મૃતિ મંધાનાએ 168 મેચોમાં 162 ઇનિંગ્સમાં 604 ચોગ્ગા ફટકાર્યા છે. ભારત માટે સ્મૃતિએ આ ફોર્મેટમાં 4475 રન બનાવ્યા છે, જેમાં એક સદી અને 35 અડધી સદીનો સમાવેશ થાય છે. તેણીએ 88 છગ્ગા પણ ફટકાર્યા છે.
