Ahmedabad Serial Blast Case : 26 જુલાઈ 2008નો એ કાળમુખો દિવસ, જયારે અમદાવાદ શહેર 21 સિરિયલ બોમ્બ બ્લાસ્ટથી ધ્રૂજી ઉઠ્યું હતું. આ આતંકી ઘટનામાં 56 નિર્દોષ નાગરિકોએ જીવ ગુમાવ્યા હતા અને 200થી વધુ લોકો ઘાયલ થયા હતા. અમદાવાદમાં થયેલા સિરિયલ બોમ્બ બ્લાસ્ટ કેસમાં ગુજરાત હાઇકોર્ટે મહત્વપૂર્ણ અને ઐતિહાસિક ચુકાદો આપ્યો છે. હાઇકોર્ટે ટ્રાયલ કોર્ટના નિર્ણયને યથાવત રાખતાં 38 દોષિતોને ફટકારાયેલી ફાંસીની સજા(38 Convicts Death Sentence Upheld) અને 11 દોષિતોને આપવામાં આવેલી આજીવન કેદની સજા યથાવત રાખી છે. સાથે જ દોષિતોની તમામ અપીલો ફગાવી દેવામાં આવી છે.
70 મિનિટમાં 21 વિસ્ફોટ, ધણધણી ઉઠ્યું હતું અમદાવાદ
26 જુલાઈ 2008નો એ દિવસ, સાંજે 6:30 વાગ્યાથી શરૂ કરીને માત્ર 70 મિનિટના ટૂંકા ગાળામાં અમદાવાદ શહેર 21 સિરિયલ બોમ્બ બ્લાસ્ટથી ધણધણી ઉઠ્યું હતું. આતંકીઓએ અમદાવાદ શહેરના વ્યસ્ત વિસ્તારો જેવા કે હાટકેશ્વર, નરોડા, કાલુપુર, મણિનગર, સારંગપુર, બાપુનગર અને નરોડાને ટાર્ગેટ કાર્ય હતા. બૉમ્બને એવી રીતે ગોઢવવામાં આવ્યા હતા જેથી વધારેમાં વધારે જાનમાલનું નુકશાન થાય. બૉમ્બને સરકારી બસો, પાર્ક કરેલી સાયકલ અને કારમાં ગોઠવવામાં આવ્યા હતા.
પીડિતોને મળશે વળતર
18 ફેબ્રુઆરી, 2022ના રોજ અમદાવાદ સિટી સેશન્સ કોર્ટે દેશના ઈતિહાસમાં પ્રથમવાર એકસાથે 38 આરોપીઓને ફાંસી(38 Death Penalty) અને 11 આરોપીઓને આજીવન કેદની સજા ફટકારી હતી. હાઈકોર્ટે આદેશ કર્યો છે કે રાજ્ય સરકારે પીડિત પરિવારોને વળતર ચૂકવવું. જેમાં મૃતકના પરિવારને 10 લાખ રૂપિયા ગંભીર રીતે ઇજાગ્રસ્ત થયેલા લોકોને 5 લાખ રૂપિયા અને સામાન્ય ઇજાગ્રસ્તોને 1 લાખ રૂપિયાનું વળતર 31 માર્ચ, 2027 સુધીમાં ચૂકવવાનો પણ આદેશ આપ્યો છે.
વકીલ અમિત પટેલ અને ભૂતપૂર્વ DCP અભય ચુડાસમાની પ્રતિક્રિયા
સરકારી વકીલ અમિત પટેલે જણાવ્યું કે, “અમે કોર્ટ સમક્ષ 49 દોષિતો વિરુદ્ધ કાવતરાના મજબૂત પુરાવાઓ રજૂ કર્યા હતા, જેને કોર્ટે માન્ય રાખ્યા છે.” બીજી તરફ, આ કેસની તપાસ સાથે જોડાયેલા નિવૃત્ત DCP અભય ચુડાસમાએ જણાવ્યું કે, “2008માં જ્યારે આ ઘટના બની ત્યારે ક્રાઈમ બ્રાન્ચે ખૂબ જ ઓછી સમયમર્યાદામાં આખા કેસનો પર્દાફાશ કરી મુખ્ય આરોપીઓને ઝડપી લીધા હતા, જે તપાસની દ્રષ્ટિએ એક મોટી સિદ્ધિ હતી.” આ ચુકાદા સાથે જ, 18 વર્ષ જૂના આ ભીષણ આતંકી હુમલાના કેસમાં ન્યાય પ્રક્રિયાનો એક મહત્વનો અધ્યાય પૂર્ણ થયો છે અને પીડિત પરિવારોને આખરે સંપૂર્ણ ન્યાય મળ્યો છે.
આ પણ વાંચો : ‘આ મારો છેલ્લો વર્લ્ડ કપ…’ રોનાલ્ડોએ સંન્યાસ અંગે આપ્યું મોટું નિવેદન
