August 2026 Price Hike India : સામાન્ય અને મધ્યમવર્ગીય પરિવારો માટે તહેવારોની મોસમ શરૂ થાય તે પહેલાં જ આ ઓગસ્ટ મહિનો મોંઘો સાબિત થઇ શકે છે. ઓગસ્ટમાં ચા, હેર ઓઈલ, કાર, ફ્રીઝ, ટીવી, કપડાં, કાર, સ્ટીલના વાસણો, કુકર વગેરેના ભાવ વધારો થવાની શક્યતા વ્યક્ત કરવામાં આવી રહી છે.

ભાવવધારા પાછળ શું કારણ છે?

રક્ષાબંધન,દશેરા અને દિવાળી પહેલા, કંપનીઓએ ભાવ વધારો કરવાની તૈયારી કરી રહી છે. કંપનીઓનો દાવો છે કે ખાડી યુદ્ધને કારણે કાચા માલના ખર્ચમાં અને શિપિંગ ખર્ચમાં વધારો થવાને કારણે તેમના ખર્ચમાં વધારો થઈ રહ્યો છે. ખાડી યુદ્ધના કારણે કાચા માલના ભાવમાં વધારો અને માલના ભાડામાં વધારો કંપનીઓ પર ખર્ચનો બોજ વધારી રહ્યો છે.

ક્રૂડ ઓઇલના ભાવમાં વધારો થવાથી માત્ર પેટ્રોલ-ડીઝલ જ નહીં, પરંતુ પ્લાસ્ટિક, પેકેજિંગ, પેઇન્ટ, કેમિકલ્સ અને પરિવહન સાથે જોડાયેલી અનેક વસ્તુઓનો ખર્ચ વધી જાય છે.

તહેવારો પહેલાં સામાન્ય લોકોના બજેટ પર અસર

રક્ષાબંધનથી દેશમાં તહેવારોની ખરીદી શરૂ થાય છે. ત્યારબાદ દશેરા અને દિવાળી દરમિયાન વાહનો, ઇલેક્ટ્રોનિક ઉપકરણો, કપડાં અને ઘરેલું વસ્તુઓની માંગમાં સામાન્ય રીતે વધારો જોવા મળે છે.

આવી સ્થિતિમાં કંપનીઓ ભાવ વધારશે તો ગ્રાહકોને એક જ વસ્તુ માટે વધુ કિંમત ચૂકવવી પડી શકે છે. ખાસ કરીને માસિક આવક પર આધારિત મધ્યમવર્ગીય પરિવારો માટે ઘરખર્ચ, તહેવારોની ખરીદી અને EMI વચ્ચે સંતુલન જાળવવું વધુ મુશ્કેલ બની શકે છે.

રિટેલ ફુગાવો વધીને 4.38 ટકા

ભારતીય ચલણ રૂપિયા પર દબાણ સાથે કંપનીઓ હવે આ વધારાના ખર્ચનો બોજ ગ્રાહકો પર નાખવાની તૈયારી કરી રહી છે. ઉલ્લેખનીય છે, કે જૂન 2026માં રિટેલ ફુગાવો વધીને 4.38% થયો હતો. મે મહિનામાં તે 3.93% હતો. જયારે ખાદ્ય ફુગાવો 5.32% પર પહોંચ્યો હતો. ફુગાવાના આ આંકડા ચિંતાજનક છે. જોકે કંપનીઓના ભાવવધારાના નિર્ણયથી સામાન્ય અને મધ્યમવર્ગ પર વધારાનો બોજ પડશે અને બજેટ ખોરવાશે તે નક્કી છે.

આ પણ વાંચો : Nvidiaને પાછળ છોડીને Apple ફરી બની વિશ્વની સૌથી મૂલ્યવાન કંપની