Gujarat Rain Forecast Today : જો તમે આગામી થોડા દિવસોમાં ક્યાંય બહાર જવાનો પ્લાન બનાવી રહ્યા છો, તો પહેલા હવામાન વિભાગની આ ચેતવણી ચોક્કસ વાંચી લેજો. બંગાળની ખાડીમાં એક મજબૂત ડિપ્રેશન સર્જાયું છે, જેની સીધી અસર દેશના ઘણા રાજ્યો પર જોવા મળી રહી છે. હવામાન વિભાગ (IMD) ની તાજી આગાહી મુજબ, દિલ્હી, બિહાર, ગુજરાત અને છત્તીસગઢમાં ભારેથી અતિભારે વરસાદ ખાબકી શકે છે. ક્યાંક ક્યાંક તો આભ ફાટવા જેવી ગંભીર સ્થિતિ સર્જાવાની અને જળબંબાકાર થવાની પૂરેપૂરી શક્યતા વ્યક્ત કરવામાં આવી છે.

ગુજરાતમાં મેઘરાજા મહેરબાન કે કહેર? 5 દિવસ અતિભારે વરસાદની આગાહી

ગુજરાતમાં હાલ મેઘરાજા મન મૂકીને વરસી રહ્યા છે. ક્યાંક વરસાદ ખેડૂતો માટે મહેર બનીને આવ્યો છે, તો ક્યાંક સાંબેલાધાર વરસાદે કહેર વર્તાવ્યો છે. હવામાન વિભાગે રાજ્યમાં આગામી 5 દિવસ સુધી ભારેથી અતિભારે વરસાદની આગાહી કરી છે. રવિવારે જ રાજ્યના 120 થી વધુ તાલુકાઓમાં વરસાદે રમઝટ બોલાવી હતી. જેમાં અમરેલી જિલ્લાના રાજુલા અને ધારીમાં તો 10-10 ઈંચ કરતા પણ વધુ વરસાદ ખાબકતા જળબંબાકારની સ્થિતિ સર્જાઈ છે.

કયા જિલ્લાઓમાં છે રેડ, ઓરેન્જ અને યલો એલર્ટ?

દક્ષિણ ગુજરાત અને સૌરાષ્ટ્રના લોકોને ખાસ સાવચેત રહેવાની અપીલ કરવામાં આવી છે. ચાલો જાણીએ ક્યાં કેવું એલર્ટ આપવામાં આવ્યું છે:

• રેડ એલર્ટ (અતિભારે વરસાદ): રાજકોટ શહેર અને જિલ્લો, સુરત, નવસારી, વલસાડ, તાપી, ડાંગ, દમણ અને દાદરા નગર હવેલીમાં રેડ એલર્ટ અપાયું છે. અહીંના લોકોને બિનજરૂરી બહાર ન નીકળવા તાકીદ કરાઈ છે.

• ઓરેન્જ એલર્ટ (ભારે વરસાદ): ગીર-સોમનાથ, અમરેલી, ભાવનગર, ભરૂચ અને નર્મદા જિલ્લામાં ભારે વરસાદની આગાહી સાથે ઓરેન્જ એલર્ટ જાહેર કરાયું છે.

• યલો એલર્ટ (મધ્યમથી ભારે વરસાદ): જૂનાગઢ, વડોદરા, પંચમહાલ, દાહોદ અને છોટા ઉદેપુરમાં યલો એલર્ટ આપવામાં આવ્યું છે.

ઉત્તર અને મધ્ય ગુજરાતમાં કેવો રહેશે માહોલ?

જે વિસ્તારોમાં ભારે વરસાદનું એલર્ટ નથી, ત્યાં પણ પવન સાથે વરસાદની શક્યતા છે. ઉત્તર અને મધ્ય ગુજરાતના બનાસકાંઠા, પાટણ, મહેસાણા, સાબરકાંઠા, ગાંધીનગર, અમદાવાદ, ખેડા અને આણંદ જિલ્લાઓમાં 40 થી 50 કિલોમીટર પ્રતિ કલાકની ઝડપે પવન ફૂંકાવાની અને હળવાથી મધ્યમ વરસાદની આગાહી કરવામાં આવી છે.

વહીવટી તંત્ર એક્શન મોડમાં: અધિકારીઓની રજાઓ રદ

સંભવિત ખતરાને જોતા રાજ્ય સરકાર અને પોલીસ પ્રશાસન એલર્ટ મોડ પર આવી ગયું છે:

• બચાવ કામગીરીની તૈયારી: અસરગ્રસ્ત થવાની શક્યતા ધરાવતા તમામ વિસ્તારોમાં NDRF અને SDRF ની ટીમોનો કાફલો તૈનાત કરી દેવામાં આવ્યો છે.

• લોકોને ચેતવણી: નીચાણવાળા વિસ્તારોમાં રહેતા લોકોને તાત્કાલિક સુરક્ષિત અને ઉંચાઈવાળા સ્થળોએ ખસી જવા જણાવાયું છે. દરિયામાં કરંટ હોવાથી માછીમારોને દરિયો ન ખેડવા કડક આદેશ અપાયા છે.

• DGP ની સીધી નજર: રાજ્યના પોલીસ વડા (DGP) સતત સ્થિતિનું મોનિટરિંગ કરી રહ્યા છે. તેઓ સંબંધિત વિભાગો અને સ્થાનિક અધિકારીઓ સાથે વીડિયો કોન્ફરન્સથી પળેપળનો ચિતાર મેળવી રહ્યા છે. કટોકટીની આ સ્થિતિમાં વહીવટી તંત્રના તમામ અધિકારીઓની રજાઓ પણ મોકૂફ કરી દેવામાં આવી છે.

આ પણ વાંચો : ‘આ મારું છેલ્લું વર્લ્ડ કપ…’ રોનાલ્ડોએ સંન્યાસ અંગે આપ્યું મોટું નિવેદન