આંતરરાષ્ટ્રીય ક્રિકેટ પરિષદ એટલે કે ICC દ્વારા જાહેર કરાયેલા નવા T20I બેટિંગ રેન્કિંગે ક્રિકેટ જગતમાં નવી ચર્ચા જગાવી છે. ભારતીય વિકેટકીપર-બેટ્સમેન ઇશાન કિશન હવે વિશ્વનો નંબર-1 T20I બેટ્સમેન બની ગયો છે. જોકે આ ફેરફાર ઘણા ક્રિકેટ ચાહકો માટે ચોંકાવનારો રહ્યો છે, કારણ કે તાજેતરની શ્રેણીમાં અભિષેક શર્માએ ઇશાન કરતાં વધુ રન બનાવ્યા હોવા છતાં તેને ટોચનું સ્થાન ગુમાવવું પડ્યું છે.
અભિષેક શર્મા નંબર-1 પરથી નીચે કેમ સરક્યો?
આયર્લેન્ડ સામેની T20I શ્રેણી શરૂ થાય તે પહેલાં અભિષેક શર્મા 875 રેટિંગ પોઈન્ટ સાથે પહેલા સ્થાને હતો, જ્યારે ઇશાન કિશન 871 પોઈન્ટ સાથે બીજા ક્રમે હતો. પ્રથમ મેચમાં અભિષેકે માત્ર 20 બોલમાં 49 રનની વિસ્ફોટક ઇનિંગ્સ રમી હતી. પરંતુ બીજી મેચમાં તે પ્રથમ જ બોલે ખાતું ખોલ્યા વગર આઉટ થઈ ગયો હતો.
બીજી તરફ ઇશાન કિશન માટે પણ આ શ્રેણી બેટિંગની દ્રષ્ટિએ ખાસ મોટી રહી નહોતી. તેણે પ્રથમ મેચમાં 1 રન અને બીજી મેચમાં 12 રન બનાવ્યા હતા. તેમ છતાં નવા ICC રેન્કિંગમાં ઇશાનના રેટિંગ પોઈન્ટ વધીને 876 થયા અને તે નંબર-1 પર પહોંચી ગયો. જ્યારે અભિષેકના પોઈન્ટ ઘટીને 869 થયા. માનવામાં આવે છે કે બીજી મેચમાં શૂન્ય પર આઉટ થવાથી અભિષેકને રેન્કિંગમાં મોટો ફટકો પડ્યો.
ઇશાન કિશનની વાપસી બાદ શાનદાર સફર
ઇશાન કિશને 21 જાન્યુઆરી, 2026ના રોજ લગભગ 3 વર્ષ બાદ T20I ક્રિકેટમાં વાપસી કરી હતી. ન્યૂઝીલેન્ડ સામેની પ્રથમ મેચમાં તેણે માત્ર 8 રન બનાવ્યા હતા, પરંતુ ત્યારબાદ તેણે પોતાના બેટથી જોરદાર જવાબ આપ્યો. આગામી મેચમાં ઇશાને 76 રનની તોફાની ઇનિંગ્સ રમી અને 31 જાન્યુઆરીએ માત્ર 43 બોલમાં 103 રનની સદી ફટકારી.
ત્યારબાદ નામિબિયા સામે 61 રન, T20 વર્લ્ડ કપમાં પાકિસ્તાન સામે 77 રન અને ફાઇનલમાં 25 બોલમાં 54 રનની મહત્વપૂર્ણ ઇનિંગ્સ રમીને ઇશાને ભારતને ચેમ્પિયન બનાવવામાં મોટી ભૂમિકા ભજવી હતી.
માત્ર 15 મેચમાં ઇશાનનો કમાલ
વાપસી બાદ ઇશાન કિશને માત્ર 15 T20I મેચમાં 545 રન બનાવ્યા છે. આ દરમિયાન તેની સરેરાશ 36.33 રહી છે, જ્યારે સ્ટ્રાઈક રેટ લગભગ 200ની આસપાસ રહ્યો છે. ઇશાનના બેટમાંથી 4 અડધી સદી અને એક શાનદાર સદી પણ આવી છે. તેની આ સતત અને આક્રમક બેટિંગને કારણે ICC રેન્કિંગમાં તેને મોટો ફાયદો મળ્યો છે અને હવે તે વિશ્વનો ટોચનો T20I બેટ્સમેન બની ગયો છે.
અભિષેક શર્માને શૂન્ય પર આઉટ થવાનું ભારે પડ્યું
અભિષેક શર્મા છેલ્લા કેટલાક સમયથી શાનદાર ફોર્મમાં હતો, પરંતુ વારંવાર શૂન્ય પર આઉટ થવાથી તેના રેટિંગ પોઈન્ટ્સ પર અસર પડી છે. આ જ સમયગાળા દરમિયાન અભિષેક 6 વખત શૂન્ય પર આઉટ થયો હતો, જેના કારણે તે નંબર-1નું સ્થાન બચાવી શક્યો નહીં.
રેન્કિંગે ક્રિકેટ ચાહકોમાં જગાવી ચર્ચા
ICCના નવા T20I બેટિંગ રેન્કિંગ બાદ સોશિયલ મીડિયા પર પણ ચર્ચા શરૂ થઈ ગઈ છે. કેટલાક ચાહકો ઇશાન કિશનની વાપસી અને સતત પ્રદર્શનને બિરદાવી રહ્યા છે, તો કેટલાક અભિષેક શર્માના રન હોવા છતાં તેના નીચે સરકવાને લઈને સવાલો ઉઠાવી રહ્યા છે. એકંદરે, નવા રેન્કિંગે ભારતીય ક્રિકેટમાં બે યુવા બેટ્સમેન વચ્ચેની તગડી સ્પર્ધાને વધુ રસપ્રદ બનાવી દીધી છે.
આ પણ વાંચો : ચેસ્ટર-લી-સ્ટ્રીટમાં વરસાદનું વિઘ્ન, વૈભવ સૂર્યવંશીના ડેબ્યૂ પર સસ્પેન્સ
